ЦААСАН ШУВУУ

   Family house буюу монголчилбол гэр бүлийн байшин гэх Монголдоо нэвтрүүлмээр санагдсан нэгэн бүтцийн талаар блогтоо оруулчихъя гэж бодлоо. Одоо Монголд байхгүй боловч хэзээ нэгэн цагт хэн нэгэн сайхан сэтгэлтэй хүн санаачлан эхлүүлэхийг таах аргагүй юм.
Юуны өмнө би ч гэсэн Family house талаар сайн мэдэхгүй hospice гэж ойлгож явснаа хэлэх хэрэгтэй байх. Харин Японд ирээд сайн дурын ажил хийж эхэлснээс хойш  салгаж ойлгох болсон юм. Энд hospice-т хийгддэг шиг эмчилгээ байхгүй харин эмчилгээгүй өвчнөөр шаналж байгаа хүүхдүүд ээж аавтайгаа гэртээ байгаа юм шиг өдрийг өнгөрүүлэх түр гэр гэсэн үг юм. Англиар a home a way from home for children fighting cancer гэж тайлбарлажээ.
Японд үүсээд эдүгээ 15 /1993-3-6/ жилийн нүүрийг үзээд байгаа харьцангуй шинэ салбар юм байна. Хаана ч байсан гэсэн хавдрын том эмнэлэг нь төв бараадан байх тул Япон улс даяар хүнд өвчтэй хүүхдүүд хөдөө хот гэлтгүй Токиод үзүүлж эмчлүүлнэ. Гэр хол гэдэг шалтгаанаар нялх хүүхдээ эмнэлэгт сахих боломжгүй, үнэтэй зочид буудалд мөнгө төлөөд байх хэцүү болохоор ээж аавууд хүүхдээ эмнэлэг бараадуулан орхиод явах нь элбэг бөгөөд энэ нь ч хүүхдийн эмчилгээнд сөргөөр нөлөөлж байгааг харсан эмч дархлал нь дарангуйлагдсан хүнд өвчтэй хүүхдүүд очиж болохуйц цэвэр бөгөөд хүүхдэд гэр мэт нь сэтгэгдэл төрүүлэх ямар нэгэн газар хэрэгтэй юм байна, тэр нь эмнэлгийн ойролцоо байх ёстой гэдгийг олж харан анх 1 өрөө тохижуулж байсан нь одоо хэдийнээ хөгжлийнхөө хэд хэдэн үеийг дамжаад хүнд өвчнөөр шаналан үхэлтэй тэмцэж байгаа хөөрхий хүүхдүүдэд ээж аав болон хайртай хүмүүстэйгээ уулзан эмнэлгээс түр боловч холдон эрхлэн тоглох боломжоор хангадаг улсын болон хувийн олон олон хаус болтлоо өргөжжээ.

  Одоо бичлэгийнхээ гол зорилгодоо эргээд орьё.
Монголд хавдар өвчнөөр шаналан чадах хэмжээгээрээ тэмцэн байгаа хүүхдүүд олон байгаагийн дээр жил бүр хавдраар өвчилж байгаа хүүхдийн тоо геометр прогрессоор өсөж байгаа гэдгийг хэлэхэд илүүц биз ээ. Хавдpын эмнэлэг болон ЭНЭШТ нь Улаанбаатарт л байдаг болохоор ээж аавууд холын аймаг хөдөөнөөс эмнэлэг бараадан ирээд, байх айлгүй багагүй бэрхшээлтэй тулгарч байдгийг сонссон төдийд хэлж байгаа биш бишгүй харсан гэдгээр батлаад хэлж чадах юм байна. Хүнд хөнгөн ямар ч байлаа өвдөж шаналсан битгий хэл эрүүл хүүхдэд хүртэл ээжийн инээмсэглэл аавын үнсэлт гэдэг хичнээн эрхэм билээ. Хүнд өвчтэй хүүхдээ орхиод явж чадах сэтгэл Монгол эжийд байхгүйг хэлэх үү , ямар боловч нэг иймэрхүү бүтэцтэй оромж хэрэгтэй юм гэдгийг би дотроо бодоод сууж тэссэнгүй блогтоо оруулахаар шийдсэн юмаа. За тэр холын хүсэл мөрөөдөл яахав, хүүхдийн hospice-той болмоор байна. Цагаа тулбал хувийн, хувьсгалын нэртэй өчнөөн асрамжийн газар байж л байна, цаана нь ч зөндөөн байгуулагдах л биз, ядаж долоовор хуруугаараа чичээд үзүүлчих ганц ч хүүхдийн hospice алгаа.

Фамири Хаусу хэмээх Японы нэгэн NPO сайн дурын байгууллагын веб хуудаснаас Япон хэлээр илүү дэлгэрэнгүй мэдээлэл авч болно:

• www.familyhouse.or.jp (Энд дарж хуудсыг google орчуулагчаар орчуулж Англиар уншиж болно.)